SAYANG UNTA KAAYO KAY ANG UBANG SAPATOS BAG-O. Pero para sa mga supporters ni Manny Pacquiao nga mi-uyon sa iyang baroganan nga supak sa pag-legalize sa same-sex union, dili nila igsapayan ang pagsunog sa ilang mga Nike nga sapatos isip pagsumbalik boycott sa Nike sa ilang gibuhat nga pagsalikway ni Manny isip usa sa ilang mga product endorser.
Ang mensahe sa mga supporters ni Manny ngadto sa kompaniya nga Nike: "Nike Burn your Sole not my Soul."
Nag-awhag sila sa uban pang mga supporters ni Manny nga mi-uyon sa iyang baroganan bahin sa same-sex union, nga unta maghimo pud kuno sila og susama niani nga kalihukan sa ilang tagsa-tagsa ka mga dapit isip kuno sumbalik boycott sa Nike ug isip pud kuno simbolo sa ilang suporta sa baroganan ni Manny. Maski kuno unsa nga produkto sa Nike pwede nga maoy ilang sunogon - sapatos, t-shirts, jackets, jogging pants, bags, caps, medyas, shorts, bands, etc.
----------
Unya ang kadtong mga walay butang nga Nike, unsa man kahay ilang sunogon? Mamalit na lang tingale sila'g ukay-ukay nga Nike products aron maoy ilang pang-tapokon ug pang-dauban. :-)
Apan basin baya ning ilang kampanya sa pagsunog og mga produkto sa Nike maka-cause hinuon simbako og sunog! Or, kung duna uroy mga labad og ulo nga mga supporters ni Manny nga mosalga'g pang-sunog sa mga Nike retailer stores or sa mga tindahan nga dunay baligyang mga Nike products? Or worse, kung pang-bumbahan uroy sa mga libog og utok ang mga retailers ug mga tindahan sa Nike?
Ngadto sa mga nag una-una og pasiugda ani nga kalihukan, gihuna-huna ba kaha pud nila daan ang posibleng mamahimong samputanan aning ilang pamaagi sa kampanya isip pag-boycott sa Nike ug pag-suporta ni Manny ug sa iyang baroganan?
